喺香港，「配音員」可以做足一世，都冇人知道佢究竟係咩樣；但喺日本，明明係靠把聲搵食嘅「聲優」，就越黎越多人步上台前，露樣甚至露埋身材。好似今晚介紹嘅呢位「夜道雪」咁，甚至可以話已經轉職做「寫真偶像」添呀！

聽日（11月21日）就迎來25歲生日嘅「夜道雪」，於中學三年級時就於家鄉札幌市被星探發掘，並加入當地嘅偶像團體「撫子團」出道，並開始經營YouTube。不過佢嘅偶像生涯並不順暢，後來更因為經理人公司唔出糧而鬧翻。離開原經理人公司後，佢輾轉間接觸到聲優工作，於是加入日本嘅聲優學校，畢業後開始其聲優生涯，最著名嘅係曾為以電單車為主題嘅《本田小狼與我》嘅主角小熊配音。但似乎佢都係鍾意露樣嘅工作多啲，事關2021年佢首次拍攝水著寫真獲得好評之後，就一直有同雜誌合作拍攝雜誌寫真及電子寫真，反而聲優工作就放慢步伐。

至於點解標題會話佢「騎術精湛」呢？各位唔使心邪啦，呢到講嘅「騎術」其實係指騎電單車。其實「夜道雪」自細就非常鍾意電單車，17歲仲讀緊高中時就已經買咗部KTM 390 Duke，仲係自己落手做維護。今年1月時佢仲透露自己目前擁有10架電單車，當中大部份都係所謂嘅「啡鈴車」，亦即台灣叫嘅「重機」，包括Honda CBR650F、GRX Demon系列嘅GR200R及150GR等。睇佢身高只有155cm但能駕馭重機，唔係騎術精湛係咩呀？

IG：yomichiyuki