黃子華於1990年嘅《娛樂圈血肉史》中，話自己當年因為好想做演員，所以一日到黑都去彌敦道等被星探發掘。事實上直到今時今日，「被星探」發掘依然係參加比賽或者徵選之外加入娛樂圈嘅最快途徑。但今晚要介紹呢位「川口葵」嘅出道過程，就幾乎係完全唔靠上述嘅方法，甚至你可以話佢係靠自己嘅奮鬥，強行進入日本娛樂圈。

現年26歲嘅「川口葵」，早於幼稚園時就被媽媽帶去做兒童模特兒，所以佢自小就有個做演員、入娛樂圈嘅目標。可惜嘅係即使佢曾經唔少比賽獲得佳績，但就一直冇經理人公司簽佢，甚至佢主動去參加女團「STU48」嘅徵選都係無果而回。但佢冇放棄呀，畢業後就一邊做OL一邊儲錢，希望搬去東京尋找出道機會，事實上佢於2020年初亦真係搬咗去東京，並向各大事務應徵，但同樣係冇人收佢。出道過程可謂屢受挫折。

轉機就發生於2020年中。話說2019年尾時佢報名參加日本節目《幸せ!ボンビーガール》嘅「上京女孩」專題，雖然人家接受咗佢嘅申請，但佢一度因為想慳錢而放棄去東京拍攝，好在家人及朋友鼓勵之下佢先起行。結果佢於節目中嘅表現終於吸引到經理人公司上門，同年出道開始拍攝雜誌寫真，仲有機會出演電視劇，星途先正式開始。

所以大家睇佢啲性感靚相都要記住：機會有時真係自己創造出黎㗎！

IG：kawaguchiaoi_1126