正如廣東話會有潮語，日文其實都有源自網絡，連字典都未必查到意思嘅流行用語。例如「映え」、「映える」就係指人或事物非常適合上鏡，如果話人「インスタ映え」，就即係話佢好適合影相放上IG，亦即英文中嘅「Instagram-able」。

而今晚要介紹呢位「月花めもり」，就被稱為「超グラビア映え」，即係「超級寫真-able」，咁你估下佢嘅身材外貌要有幾正，先會有咁嘅評語？

現年23歲嘅「月花 めもり」係去年年初出道嘅「寫真新星」。之所以要用引號，係因為其實今次已經係佢第二次出道。早在2022年時，佢就以「大葉めも」之名寫真出道，而且出道僅5個月就於《週刊Playboy》主辦嘅「新世代グラドルボイン番付 2022年秋場所」（ボイン係巨乳嘅俗稱）被選為「東橫綱」，可見佢嘅最大賣點就係豐滿上圍。同年年尾嘅「年度寫真大賞2022」中佢又獲得新人賞，絕對係當時最受期待嘅寫真新星之一。

可惜嘅係，2023年時佢就宣佈「寫真引退」，最終於2023年10月推出首本實體寫真集後與寫真界告別。後來更離開原本嘅經理人公司，將藝名改成「Memo」並加入偶像團體，似乎立意要遠離寫真。

好在，去年年初時佢於社交媒體上宣佈會以新藝名「月花めもり」於寫真界再次出道，並於同年4月推出換名後嘅首隻寫真DVD。事隔年半再拍寫真嘅佢依然狀態大勇，而且比起當年略為修身，結果除咗被媒體冠以「超級寫真-able」嘅稱號之外，寫真DVD銷量亦打入去年Top 50之內。希望佢今次唔會好似上次咁匆匆引退，能夠拍更多作品滿足Fans啦！

IG：mmeeoo914