寫真界係一個以男性觀眾為主嘅市場，寫真女星賣嘅其實唔係佢哋嘅身材外貌，而一個「你班麻甩佬可以同我做啲咩」嘅幻想。亦正因為要維持呢個幻想空間，絕大部份寫真女星都唔會公開自己嘅感情狀況。不過今晚要介紹呢位「髙峰じゅり」就係一個例外，事關佢公開嘅唔係「感情狀況」咁簡單， 而係公開自己「鍾意同性」嘅取向。咁唔知各位男士會覺得佢無哂幻想嘅價值，定係為你打開新一片嘅幻想空間呢？

現年22歲嘅「髙峰じゅり」出身於日本滋賀縣，早年佢以「やしろじゅり」之名活躍於大阪嘅攝影會，後來得到經理人公司發掘而加入寫真界，並於2023年於《週刊Young Magazine》首次發佈水著寫真出道。同年10月因為拍攝於2024年1月推出嘅首隻寫真DVD而搬到東京，3月時以外卡身份參加著名嘅寫真比賽「Miss Magazine 2024」，雖然就無拎到獎，但就已經憑住「上圍及臀圍都係97cm（38吋）」嘅姣好身材引起大家注意，成功於寫真界站穩陣腳。

但就係呢個時候，佢就於X上「出櫃」，公佈自己係女同性戀。去年佢接受訪問時指，公開出櫃係因為佢知自己根本守唔住任何秘密，一個唔該連屋企地址都可能會講出去，所以倒不如直接同大家坦白。佢亦透露公開性向之後，曾經收到Fans私訊話「諗到我都可以同你一樣，就覺得開心」，令佢了解即使公開性向都可以得到Fans支持，仲希望可以啟發到其他人添！

至於公開性向後有無影響寫真事業，佢又習唔習慣被男人望住？「髙峰じゅり」就頗為自豪地話：「我唔知咁樣講適唔適合，但我超級鍾意我自己。第一次著泳衣時我望住塊鏡諗：我著泳衣真係好鬼可愛！」係囉！可愛咪得囉！

IG：takamine_juri