如果你覺得今日要介紹呢位「澤田百」個樣有啲熟口熟面、但個名又好似冇見過的話，咁你嘅感覺係正確㗎！事關兩年前我其實已經介紹過去，不過當時佢個名係叫「入來もも」。雖然我唔知點解佢要改名，但睇佢近來嘅工作，似乎就係打算演員、寫真雙軌發展啦！ 

現年22歲嘅「澤田百」出身於沖繩宮古島，從小學五年級起就已經於當地嘅劇團做演員，直到2022年高中畢業先搬去東京發展，並於同年為《週刊Playboy》拍攝寫真處女作正式出道。睇到「澤田百」嘅一頭黑長直髮，以及白晢皮膚、清澈眼神，你都知佢最大賣點就係清純學生感。而從佢頭兩輯電子寫真題為「清淨」同「健康」，你就知道當時雜誌有好好利用佢嘅特點，亦的確為初出道嘅佢帶來唔少人氣。

不過往後「澤田百」嘅發展就進入停滯，就算於2024年改名重新出發似乎都無咩幫助，過去兩年連寫真新作都欠奉。不過佢嘅演員資歷及清純氣質近日終有回報，今年年初時為《週刊Young Magazine》以及YouTube頻道「ゴシップシュガー・フィルムズ」出演有微微「百合」風、探討女高中生對同性身體好奇嘅YouTube短劇《秘密の放課後撮影会》，再配上雜誌嘅聯乘寫真，再次令人感受到佢嗰種充滿青春氣息嘅魅力。希望「澤田百」未來有更多新作，供大家好好欣賞啦！

IG：sawada_momo_no