早排DJ Soda嚟香港突襲Take Flight International全場起哄，見大家咁大反應，DJ Soda都有回應，聽下佢講乜先。本名黃素熙嘅DJ Soda近年人氣急升，全靠著住貼身tube top彈下彈下咁打碟，非常活潑加埋佢勁cute嘅管樂舞，令佢clubbing界大受歡迎。咪睇佢個樣cute cute哋係細路女，其實今年已經27歲，所以中女之年講嘢比較直接，反而冇初出道嘅妹妹仔咁虛偽，面對批評都會正面回應。

DJ Soda都去過唔少地方打碟，經常巡迴韓國、台灣、泰國同越南嘅club，咁佢覺得香港同韓國club有咩分別呢？「我仲未有機會認真接觸香港嘅club，不過香港似乎比韓國更加國際化，我都好想玩返一晚。」雖然香港club已經冇以前咁好玩，好多人都寧願返大陸玩，玩得癲之餘又容易搵到食，所以就連Beijing都要收檔，但我都應承下次過嚟同佢去香港嘅club玩下。不過我10月中就會去韓國玩，有冇好介紹先？「韓國嘅club有好多種，大街小巷都可以搵到唔同音樂風格嘅club，我推薦大家可以去弘大一帶，比較多hip hop音樂，但場地就比較細。如果想去大場就要去江南，音樂風格就以電子舞曲為主，而且靚女都比較多。」唔覺佢提自己出道嘅弘大Madholic喎。

講佢講完，覺得DJ Soda對club music真係幾熟，隨口都講得出韓國唔同club嘅音樂風格。不過講到佢打碟，好多人都覺得佢播來播去都係得首New Thang，而且press and play之後又就喺度彈下彈下跳舞，我都好直接同佢講大家唔係好buy，而且香港好多掛名DJ都係model兼做，你又點睇呢？「其他人點做DJ我就唔評論，而我知道好多人都話我只係扮嘢，但其實我唔使用laptop都可以用到turn-tables同CDJ打碟。我都好肯定有女DJ真係乜都唔識，但被以貌取人真係唔公平，我亦感同身受，不過我會證明畀大家睇下我嘅實力。」

其實除咗DJ工作之外，原來DJ Soda仲係Jordan收藏家添。「每一代Jordan穿我都咁鍾意，但著得最多就一定係Jordan 11，事關藍色最好襯，男女都啱著。」Jordan喺香港一樣好受歡迎，唔少男仔都會著Jordan 11襯衫，咁著Jordan 11有冇分加呢？點睇香港男仔呢？唔使咁快就講「這些機會...」，原來DJ Sods對香港男仔都有一定好感，而且佢嘅要求其實唔難。「今次嚟香港雖然冇時間出去玩，但街上見到香港男仔都打扮得幾好睇，而且覺得香港男仔識講英文好正。身高樣貌冇特別要求，但比鍾意Street Style打扮嘅男仔，最好就cute cute地加上有啲內涵咁就good。」

講到將來有咩目標，會唔會試下推出自己品牌，DJ Soda就話暫時都係會集中音樂發展。「希望可以盡快推出處女專輯，音樂風格可能都會係以Hip Hop同R&B為主，而我好鍾意Wu-Tang Clan、Twinz、Yellow Claw同Kendrick Lamar。」希望到時唔會成隻碟都係New Thang啦。