先有《激戰》張家輝、《豪情》杜汶澤，後有AB餐張繼聰，再加上近日新鮮滾熱辣的膠面方力申（唔係方力申嘅錯，係執相條友嘅錯），一股「肌男」旋風正式掀起，直撲全港男士！

由呢一刻開始，唔理你係肥底定瘦底、高佬定矮仔，就算你冇諗過去打MMA、同女優肉搏或者攝嘢賣底褲廣告，你最好都有返3、5、7舊胸肌腹肌旁下身！如果唔係你就要背上「你都唔經營自己嘅！！你睇下人地！！」呢個莫須有嘅罪名。

事實上，以上四位男星減肥谷肌的決心同毅力的而且確值得我地敬佩。你睇杜汶澤為了一身肌肉，每日只食白烚雞胸加蛋白；方力申、張繼聰每日做三個鐘運動，一個禮拜做足7日；張家輝為左《激戰》張宣傳照而戒水收乾。呢啲行為如果人地逼你做，佢肯定係虐待緊你！而佢地係呢個就算住一樓都硬係要搭「車立」上落嘅社會，單憑個人意志就擺脫食物嘅誘惑而成功虐待到自己，你話係咪能人所不能先？

但如果你以為「個人意志」就是他們爆肌的秘訣，咁你就錯了。計我話佢地之所以能夠抵擋食物誘惑、虐待自己，是因為係背後有更大的誘惑作為動力！正如黃子華話齋「啲明星三個禮拜減三十鎊？真係Work！你只需要搵一間有信譽嘅減肥公司，你去減肥，佢比錢你，真係Work！」

藝人明星無啦啦練到爆肌可能係為左拍戲、拍劇、拍廣告，又或者練好副偈拍個好碼頭。無論原因係為左咩，佢地都係用幾個月的全副心機去準備，然後係某一個時間點，亦即係你見到佢爆肌嘅一刻，以最佳狀態出現。

事實上除左張繼聰無提過，另外三個人都大方承認完成工作之後身形已經縮水。換言之，當你抱怨點解自己男人冇咁嘅身材嘅時候，你係拎緊因工作需要而花費數月全職健身後，身形處於最Fit狀態下的藝人，黎同你嗰個返朝9晚9做到冇得抖、三餐都未必定時嘅男人作比較。你自己話啦，公平咩？

更重要的是，女人准許自己對住呢啲爆肌相面紅尖叫，高呼「呢個係我老公黎架！」「第時男朋友都一定要咁大隻咁靚仔」，甚至嫌棄自己男人的外在身體條件的同時，男人卻連在街上觀賞美女的正常行為都會被標榜成咸濕變態！女同事在自己位貼滿大隻仔，冇人有意見；男同事個杯有個大波妹，所有人都有偏見！你追求八舊朱古力腹肌是識食，我追求兩團軟綿綿胸部就是公敵。

大家都係「目及」，點解淨係我核突？

真的，跟明星的比較並不討厭，只准州官放火不准百姓的不公平，才是真正令人討厭的。