有無覺得唔少港島為基地嘅中型餐廳，都開始嘗試衝出中環，進駐九龍區，法式扒房La Vache! 就係最好例證，最近好大機會又多一個成功例子，Pirata集團旗下，主打手工製作意粉嘅餐廳Pici，尖沙咀開新店，想食唔使過海啦。

Pici 主打每日供應新鮮手製意粉，出品質素相當高，不過價錢唔貴，所以一直都好有收視，捧場客甚多。餐廳致力將地道的意式風味帶到香港，專注製作一系列意粉Orecchiette貓耳朵、Tagliatelle、Ravioli、Carbonara、Lasagna等等，貴精不貴多，飲埋意大利紅酒就fit晒。

除意粉以外，餐廳主廚Andrea Viglione更特別設計多款尖沙咀店限定的菜式，包括Starters中的Seafood Salad（$110），新鮮大蝦、魷魚、八爪魚及青口伴蔬菜絲，灑上清新的檸檬油，輕盈開胃；Pasta中的Fagottini（$130），精緻的意大利餃加入嫩滑鴨肉、大蔥絲及青豆，最後綴以香濃的即刨意大利巴馬臣芝士，以及包入蛋黃的香滑Ravioli（$130），手製意大利雲吞以ricotta芝士、牛肝菌及shimeji鴻喜菇拌炒，簡單做出最地道最真實的味道。

Pirata集團創辦人Christian Talpo表示：「能夠將每日新鮮製造的優質手製意大利麵帶到尖沙咀區，我們團隊感到十分興奮。我們專注設計一系列撫慰人心、讓人想一吃再吃的菜式，希望食客能尋找到他們喜歡的手製意大利麵、新味道及特別的口感。」

新店更亦會供應定期變更的午市餐單每份午餐包括一份前菜、意大利麵及甜品，週末就有和伴侶一同可享的早午餐（每人$280），兩人可享用三款意大利麵、前菜及甜品各兩份，每人更有一杯氣泡酒，讓食客度過一個輕鬆悠閒的週末。

雖然Pici尖沙咀店無得Book，但餐廳並唔收服務費，值得一讚。

Pici 尖沙咀店

地址：尖沙咀漆咸道南29至31號溫莎大廈A座12號地下及10/11號鋪(赫德道入口)

電話：2771 2231

營業時間：

星期日至四 下午 12 時至晚上 11 時

星期五至六 下午 12 時至晚上 11 時半

早午餐

星期六、日及公眾假期 上午 11 時半至 下午4時