旺角白布街、黑布街、染布房街一帶由早年Cafe林立，到依家發展酒吧、餐廳錯落嘅年輕飲食旺區。而四年前於尖沙咀開設第一間分店、以精品啤酒站穩陣腳嘅「掌門」亦將進駐該地帶，於染布房街開設第二分店。

掌門以提供多款各有特色嘅手工啤及精釀啤而聞名，同時亦有Beertail特色調酒、惹味小食等提供，令其成為唔少啤酒愛好者嘅聚腳地。而新店當然就唔係將尖沙咀店Copy & Paste咁簡單，而係引入多款適合秋天嘅新啤酒。例如命名為「不醉不會」嘅English Barleywine具麥芽及焦糖香，ABV高達10.2%；「江南煙雨」就係HAZY Session IPA，質感有如果汁，帶七種酒花、芒果、菠蘿及柑橘等口味。而「神遊艾雷鳥」本名Peated Scotch Ale，睇個名都知佢係帶泥煤味嘅蘇格蘭啤酒；個名最普通嘅「藍梅西打」，就真係用加州藍梅釀成，ABV低而且酸甜適中。

「半糖少冰」

「八色彩虹」

「開到荼蘼」

「井仔腳的荔枝樹」

另外新店亦有由調酒師Kris創作嘅新Beertails。「半糖少冰」以掌門自家精釀啤酒「找茶」為基調，於濃濃鐵觀音烏龍茶香中再加入伯爵紅茶煮沸，據說飲落好似茶記奶茶，再掉埋啲台式珍珠落去就變港風台式珍珠奶茶；「八色彩虹」就用上帶濃厚黑朱古力與麥芽味的黑啤「X教授」再加入蘋果汁；「開到荼蘼」就係Rum酒加桃味酒和茉莉茶、「井仔腳的荔枝樹」就以Tequila加入荔枝風味而成。

除咗酒之外，掌門嘅佐酒小食亦頗為出色。新店提供「椒鹽粟米串」、「香辣蒜雞翼尖」、「麻辣鴨舌」、「麻辣魔芋」、「麻辣雞腎」及「椒鹽雞軟骨」。據說香辣蒜雞翼尖與「大西北一國」同類產品相比更有麻香，而椒鹽雞軟骨就係順應員工及客人嘅民意而特地加入菜單。

掌門精釀啤酒——旺角店

地址：旺角染布房街12至14A號依利大廈地下A舖

營業時間：15:00 - 01:00

電話：2886 8018