漢堡包一向係唔少人嘅至愛，中間肉嫩多汁嘅漢堡，加上清爽蔬菜、美味醬汁，確實令人愛不釋手。而漢堡包價錢亦風儉由人，平嘅$10幾蚊就食得，貴嘅可能要幾百蚊先食到。不過，以下呢個漢堡包就誇張得多，因為佢將成為全球最貴嘅漢堡包！

一間位於荷蘭嘅餐廳「De Dalton’s」，近日就推出索價 €5,000 歐嘅超級漢堡包「Golden Boy」，其選用左日本和牛、白鯨魚子醬、阿拉斯加帝王蟹以及白松露等高級食材，並於漢堡包上方放上滿滿嘅金箔，完美呼應「Golden Boy」呢個名。

據負責人指今次推出呢個貴到爆嘅漢堡包，係為左幫疫情之下嘅餐飲業，佢希望製作呢個全球最貴嘅漢堡包收益全數捐出，為社會出一份力。

目前健力士世界紀錄全球最貴嘅漢堡包係2011年由美國俄勒岡州一間餐廳創下嘅，紀錄為€4200歐元。