無論係因為香港人鍾意去Cafe打卡，又或者越黎越多人對咖啡有需求又有要求，反正近年香港的確係多咗好多咖啡店。而於天后及中環都有分店嘅Preface 近日就進駐銅鑼灣霎東街，開設四層樓高，唔單止有咖啡有嘢食，而有酒飲甚至有嘢學嘅旗艦店Preface Coffee & Wine。

Preface本來就唔係一個咖啡店品牌，而係一間教人寫Program嘅學校，於2020年開設第一間Preface Coffee，其實為咗令大家知道「Program」都可以同大家嘅日常生活非常接近。當時佢哋推出即時分析時間、氣溫，甚至當日新聞頭條黎決定咖啡甜度、濃度以及咖啡豆種類嘅「AI Coffee」，後來又出過以大數據估計未來40年後得出嘅「Future Drinks」。

而銅鑼灣新開嘅Preface Coffee & Wine，就係為咗進一步將編程帶進大家嘅生活。新店樓高四層，整體走美國矽谷式潔白簡約，地下一層為Grab & Go方便附近上班族，一樓食正條水叫「Metaverse」，日頭有咖啡配上本地食材製作嘅主食；夜晚就變身酒吧提供如Kohki Iwata Cuveé WA 2020，以及限量配產、目前只有兩間米芝蓮星級餐廳先有提供嘅的Weingut Keller Riesling Trocken 2020等佳釀。

「蟹肉牛油果烤吐司」(港幣95元)

講咗咁耐，咁新店嘅「編程」喺邊到？首先係店內使用嘅咖啡豆，都係利用大數據預測咖啡潮流趨勢，再配上低碳、公平貿易等原則而進行採購。另外一樓「Metaverse」亦會定期邀請擁有美國麻省理工學院課程資格嘅編程導師，開設工作坊講解AI、NFT以至Metaverse等新興科技概念，亦會與大學、著名科技巨企等舉行講座及展覽，希望大家能夠飲住咖啡、呷住酒咁了解科技發展。

如果你想再了解得深入啲，又或者回到Preface「本業」，即係學Programming，新店嘅二樓其實就係上堂嘅地方，三樓未來亦會開設書店。Preface創辦人兼CEO 新聞稿中Tommie話希望大家可以「在人類群星閃耀時，與時代並進」，只能話真係跟得好貼。

銅鑼灣旗艦店  

地址：銅鑼灣霎東街11號The Sharp 地下至5樓    

營業時間：    

星期日至星期一：早上8時至晚上6時

星期二至星期六：早上8時至晚上9時30分