據《Wall Stree Journal》報導，北韓早前拒絕由中國提供嘅300萬劑科興疫苗，原因唔係嫌科興冇用、亦唔係嫌自己被列為「發展中國家」，而係好大口氣咁話「我唔需要，拎去畀其他更有需要嘅國家啦！」

北韓領導人金正恩日前現身，身材暴瘦，其中一個說法係佢自己去咗打疫苗，仲有好嚴重副作用先瘦到咁。

為協助發展中國家替國民注射疫苗，世衛、UNICEF、全球疫苗與預防注射聯盟 (GAVI)及流行病防備創新聯盟（CEPI）組成嘅「嚴重特殊傳染性肺炎疫苗實施計劃 (COVAX)」積極地向富有國家尋求疫苗供應，然後轉發畀發展中國家使用。但據《WSJ》引述聯合國消息人士指，北韓早前拒絕接收來自中國科興嘅300萬劑疫苗，話應該送去畀疫情更嚴重嘅國家。

而北韓之所以咁有自信，係因為到目前為止，佢都係「零確診」國家。早前世衛於北韓為近四萬名人員進行檢測，一個確診都搵唔到。

有趣嘅係，今年一月時，《WSJ》報導指北韓主動向GAVI申請疫苗援助，但無論係俄羅斯提供嘅Sputnik、定係台灣都打緊嘅AstraZeneca (AZ)，北韓都拒絕接受。當時報導指北韓政府因為擔心疫苗副作用而拒收。北韓國家電視台亦每日報導歐美民眾接種疫苗後出現嚴重副作用嘅新聞。

咁究竟今次唔接受中國疫苗，係真係唔需要，定其實都係驚，只係唔敢講明呢？

資料來源：Wall Stree Journal