雖然可口可樂一直堅稱紅色可樂與黑色可樂嘅味道係一模一樣，但作為一個飲咗紅色可樂接近三十年嘅人，我一直都好有自信自己能夠「盲試」出兩者嘅分別。直到上年我真係同朋友打賭，然後輸咗五舊水，我就開始懷疑自己係咪真係有憑條脷分辨出紅、黑可樂嘅能力。而近日就有研究指，原來人體根本唔係靠條脷去分別普通糖份及代糖，而係靠條腸。

美國杜克大學醫學院神經及藥物系教授Diego Bohorquez近日發表咗個研究，指出人類嘅十二指腸，亦即係連接胃部嘅腸臟中，有一種名為「Neuropod cells」嘅神經細胞，而Neuropod細胞喺接觸到糖份時，會以微秒計嘅速度，向腦部發出麩胺酸 (Glutamate)，但當接觸到代糖時，就會發出另一種名為ATP嘅物質。正正就係因為呢種分別，所以你個腦就會知道依家飲緊嘅究竟係普通糖份 (即係紅色可樂)，定係代糖 (黑色可樂)。

圖中綠色部份為老鼠腸道中嘅Neuropod細胞

圖片：Duke University

更重要嘅係，研究團隊透過「光遺傳學 (Optogenetics)」技術，能夠暫時「關掉」Neuropod 細胞分辨糖份嘅能力，從白老鼠實驗中，就發現關掉Neuropod細胞後，白老鼠就唔會對普通糖份又或者代糖有明顯嘅偏好，簡單啲黎講就即係分唔出兩者嘅分別。相關嘅研究證實改變腸道嘅功能，就能改變人類嘅行為。未來或者亦可以用相對原理，解決某啲人對糖份嘅依賴。

資料來源：The preference for sugar over sweetener depends on a gut sensor cell