經過超過兩年嘅疫情，相信唔少人都非常期望回復「正常生活」嘅一日，但當近排疫情稍緩，條街多咗好多人之後，你又有冇覺得出街有啲壓力？外國近來就出現一個新興字「社交宿醉 (Social Hangover)」，黎形容回復「正常生活」之後，大家對於社交感到疲乏及有壓力嘅現象。

據英國心理治療師Jodei Caiss指，所謂「社交宿醉」係指經過一定時間嘅社交活動後，感到非常疲憊，只係想返屋企自己一個休息下。佢話情況就同一個好耐冇做運動嘅人突然去做Gym一樣，「經過兩年嘅限制、孤獨、分離，當大家要再次進行正常社交活動之後，就會感到非常疲倦。就等如大家好耐冇去做Gym，再去返嘅時候，係冇可能做返同之前一樣嘅強度。」佢亦提到「社交宿醉」其實並非一個全新概念，只係以往只出現於性格內向嘅人身上，但經過疫情之後，多咗人面對呢個情況一樣。

佢話講到尾嘅原因，其實就係大家身心都已經習慣疫情之下冇街出、見朋友要Facetime嘅生活，「好多人嘅腦中都已經對呢個『New Normal』建立新嘅神經傳導路徑，所以當要改變時就會出現焦慮、害怕嘅情緒。而皮質醇隨壓力而增加後，就會影響人嘅認知能力，令大腦出現無法處理更多事嘅Hang機狀態。」

而解決辦法其實亦好簡單，就係畀時間自己慢慢適應。「重要嘅係我哋知道呢件事嘅存在，以及我哋個腦係點運作，咁就可以有意識地為腦部健康著想休息一下，去理解、處理自己嘅情緒。如果你於社交後感覺疲倦，好可能係因為你做得太多，如果我哋唔畀足夠時間自己去重新充電，可能會有心理、情緒、身體上嘅不適。」

資料來源：Glamour Magazine