《論語》有云：五十而知天命、六十而耳順，原意大致就係講緊人年紀越大，對世事嘅睇法就會越和順，越唔會去強求。而喺大家普遍嘅認知當中，或者都會感到年紀越大嘅長者，大致上都更為和善，更樂於助人 (再次強調，「大致上」呀下)，但你又有冇諗過點解呢？原來唔係因為人生經驗、亦唔係因為「睇化咗」，而係因為體內嘅內分泌！

雖然早有研究指出，人體內催產素嘅水平與「善良 (Kind)」及「大方 (generosity」有關，而美國加州Claremont研究大學嘅Dr Paul J Zak就希望進一步研究「催產素水平」與「年紀」之間嘅關係。於是佢搵黎100名年齡介乎18至99歲嘅成年人，先抽血量度體內催產素，再請佢哋睇一段過往研究能刺激人體分泌催產素、關於一個患癌小童嘅片段，然後再抽多次血量多次催產素。最後參加者仲可以選擇捐出部份收入以支持小童癌病基金。另外亦會收集參加者嘅情緒狀態，以分析佢哋目前嘅生活滿足度。

結果就發現，年紀越大嘅參加者，睇完段片後體內釋放出黎嘅催產素亦會越高；同時體內催產素越高者，亦更願意捐助小童癌症基本，而「幫助別人」呢個行為，又會刺激體內分泌更多催產素，形成一個「好人循環」。研究亦發現，年紀越大者，對於生活嘅滿足度亦越高。證明年紀越大者越傾向會幫人，而幫人亦會令佢哋生活得更快樂——唔知呢個學者有冇興趣將個研究搬黎香港做？可能會有好唔同嘅結果都未定？

資料來源：PsyPost