日本少子化問題嚴重，唔好話結婚生仔、唔少日本年輕人連拍拖、做愛都冇興趣，似乎整個日本都進入一個「性冷感」時期。不過今日日本就出現一個令人意外嘅新聞：據日本國立感染症研究所昨日公佈，2022年上半年間日本梅毒個案急增至5,615宗，即係全年有可能會破萬，唔單止比去年升咗六成，近創下1999年以來問高紀錄。

大家都知梅毒嘅主要傳播途徑係唔安全嘅性行為，而梅毒個案急升似乎係暗示日本人做多咗愛，問題係考慮到日本年輕人嘅生活方式，再加上疫情之下限制社交，「做多咗愛」呢件事似乎違反直覺。新聞一出後有網民都於Twitter上表示：「20代年輕人拍拖率創新低而性病報告創新高？咁得意？」，亦有唔少人自嘲「第一次覺得處男係件好事」。

pic.twitter.com/1FTR9xqZ6G

— メトロンアクア社長 (@sHyl1ldW6LTAPG8) July 13, 2022

另外如果按年齡及性別將患者分類，可以見到最多患者嘅係20-29歲嘅女性，有超過400名患者，同年齡階段男性患者只有253名。但女性患者人數進入30歲後就大幅減少至數十名，反而男性患者就於30-39歲最高 (303名)，40代、50代到60代都大幅拋離同年齡嘅女性患者人數。

有網民猜測，梅毒個案激增可能與風俗業有關，因為女性風俗業者通常集中於20代，而男性顧客就分佈於20-69歲，而且風俗業者及顧客基本上來來去去都係嗰班人，梅毒好容易於「圈內」傳播；另外亦有人將原因指向同性戀者，又或近年盛行嘅Tinder等交友App。但目前未有官方定論。

資料來源：讀賣新聞