肥胖係唔少都市人都要面對嘅問題，大家身邊亦一定有人係嘗試緊唔同方法減肥。不過近日美國一個研究就發現，要有效減肥其實好簡單，重點唔係你食啲咩、點食法、做咩運動、做幾多運動，而係黃子華於廿年嘅《冇炭用》就已經提出嘅「你去減肥、佢畀錢你，真係Work」。

美國素來係肥胖人口最多嘅國家之一，特別係當地嘅低收入家庭，由於冇辦法負擔健康食物又或運動費用，所以唔少人都肥到需要醫療協助。而為咗搵出令佢哋更有效減肥嘅方法，美國飲食協會早前就進行咗一個研究，搵黎688名本身已經因為肥胖問題而睇緊醫生、年齡介乎18-70歲、平均體重218磅嘅對象，先為佢哋提供卡路里追蹤程式、健康手環、重量計等基本工具，隨後將對象隨機分成三組，一組會按其減去嘅體重百份比而獲得現金獎賞、一組會按能否堅持健康習慣 (如每週運動75分鐘或以上) 而獲得現金獎賞，最後一組則不會獲得任何現金獎賞。

結果發現，喺冇獲得任何獎賞嘅組別，只有22.1%能夠於研究期內減去5%或以上體重，而按堅持健康習慣而獲得獎賞嘅組別，就有39%能夠減去5%體重，按減去體重百份比獲得獎賞嘅組別，更有近半 (49.1%) 人能夠減去5%體重以上。而平均而言，「堅持健康習慣」組別能夠獲得440美金獎賞，而「減去體重百份比」組別就能獲得303美金。

資料來源：NBC