廿年前回憶《洛克人X4》最速通關全片

文：MenClub 魏文青　　
POSTED ON 19 Jun 2017

曾幾何時，《洛克人》係一隻集難度、收集於一身，非常有挑戰性嘅橫向捲軸遊戲，其中於1997年推出嘅《洛克人X4》更加係高峰之作。一來首次加入用劍嘅ZERO令粉絲好興奮，同時又因為畫面、語音等細節比起前作(甚至某啲後續作)都黎得更加精美，所以非常受歡迎。而喺20年後嘅今時今日，突然又多咗好多人諗返起呢隻經典之作喎，點解呢？

原因就係網上流傳一條「Speedrun」，號稱以最快嘅時間用X同ZERO分別打爆機。其實呢條片早於2011年已經於網上流傳，當時係首先有X版本，以39分49秒全破，後來先有ZERO版37分10秒全破。之於點解可以咁快，就係因為玩家用咗兩個秘技，第一就係小跳步。《洛克人》系列中有衝刺，理論上就比行路快，但因為起動同完成都有硬直，所以其實不停小跳係更加快，不過就代表操控上需要不停連按跳掣。但Speedrun玩家通常都係用其他程式黎操控，所以就算係極限操控都可以做到。
X 39分49秒爆機 ZERO 37分10秒
另一個秘技就係攻擊方法，又稱「失禮劍」同「失禮炮」。「失禮劍」呢個詞出自《Romancing SAGA 3》中嘅其中一招劍技，特徵係背對敵人揮劍，因為喺X4中以ZERO做Speedrun時會不斷以衝刺取消攻擊硬直以最大化傷害，久唔久就會出現「背對敵人揮劍」嘅情況，所以當年被日本網友戲稱為「失禮劍」，而「失禮炮」就係用X時，利用Boss走出畫面時取消發炮硬直嘅技巧。

依家睇返呢隻廿年前嘅Game，真係好令人懷念嗰時可以專心打足一日機嘅幸福日子呀！