- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
| |
騎士今年未能成功衛冕總冠軍，正當唔少球迷都認為佢地可能會進一步增兵嘅時候，突然騎士卻傳黎總經理David Griffin落台嘅消息，有指Griffin離開騎士係因為騎士老闆唔願意為呢位冠軍經理加人工，所以迫使佢只能夠選擇離開。對於呢個消息，隊中核心LeBron James亦全不知情，有指呢位「NBA第一人」對於騎士嘅做法相當不滿，今次球隊呢個決定可能會引發一個意想唔到嘅結果。 | |
| |
| LeBron James同David Griffin二人嘅關係密切，對於自己被騎士一方暪住，呢位球隊核心明顯對騎士非常失望並且相當唔滿意，要知道Griffin就係帶領騎士創造歷史嘅個位掌舵人之一，係佢完成Kevin Love嘅交易，其後又係佢成功同Kyrie Irving續下一份價錢唔錯嘅合同，最後更成功帶回LeBron James。係Griffin佢一手打造現今球隊嘅主要陣容，而最重要嘅就係佢帶比騎士去年奪得總冠軍嘅機會，所以我Mr.波特真係好明白點解LeBron會唔高興。 | |
| |
| 騎士選擇唔高薪同Griffin簽約，全因為騎士老闆太過吝嗇，佢唔願意為已經成功奪冠嘅球隊拿出更多嘅金錢，而呢個決定將可能會引發佢想像唔到嘅可怕結果。 | |
| 要知道當日LeBron James願意回歸騎士，係因為同老闆有一個承諾，就係佢一定要唔吝嗇咁為球隊增兵，最終佢亦都兌現承諾，為球隊帶黎2016年NBA總冠軍。不過，奪冠後呢位老闆就好似失去動力咁，唔再願意多拿出佢嘅金錢，好似喺今個賽季中，LeBron一直公開要求球隊增加一名控衛，但係最終球隊只帶黎Andrew Bogut同Deron Williams，顯然簽下Bogut係失敗的，而Williams亦只能夠講佢嘅狀態實在下跌得太快，所以兩宗看似便宜嘅交易其實都可以用失敗黎形容。而係對待總經理Griffin一事上，按照常理當總經理工作出色，甚至為球隊帶黎總冠軍，佢都理應獲得加薪續約，但係喺騎士身上就變得唔再理所當然。 | |
| |
| 對於自己信任嘅Griffin離開，LeBron同老闆嘅分歧將會進一步加深，目前已經有唔少傳聞指呢位「NBA第一人」可能會轉投湖人，以取代Kobe成為湖人新一任代表人物，對於現在群龍無首嘅湖人黎講，LeBron絕對係球隊復興嘅理想人選，佢將可以成為球隊嘅頭號球星，再加上市場號召力，以及輝煌嘅歷史，相信佢地要重返強隊之列絕對無想像中咁難。 | |
| |
| 另外，溜馬球星Paul George亦已經表態將會喺明年夏天完成合同後轉投湖人，所以預計溜馬為左避免人才兩失，可能會喺今年盡快同湖人交易，咁樣LeBron加上Paul George呢對組合將可以加速湖人變身成奪冠大熱之一。 | |
| |
| 如果騎士真係失去LeBron，即使球隊仲有Irving同Kevin Love支撐，但係佢地兩個都欠缺領軍嘅能力，所以騎士都幾肯定會再次掉出季後賽行列，變成一支半紅不黑嘅球隊。其實咁嘅情況唔難預計，所以騎士亦可能會再進行交易，相信佢地會好大機會送走Love，而Irving應該會繼續留隊，所以就要睇下Love究毫可以換個咩球星番黎啦輔助Irving啦。 | |
| |
| 就係咁2016年奪冠嘅騎士將可能會面臨失去LeBron James同Kevin Love兩位球星嘅境地，當然一啲一直視LeBron為大哥嘅球員好似JR Smith、James Jones等球員，相信亦都好大機會隨LeBron離隊，咁樣騎士嘅實力將會進一步下跌。再加上失去左奪冠嘅吸引力，騎士亦好難吸引到一啲老將願意大幅減薪加盟，最終騎士無論係正選定係板櫈深度都必定會大幅下跌。 | |
| 面對咁嘅「絕望真相」，唔知騎士老闆宜家會唔會好後悔自己唔高薪續約Griffin嘅決定呢？ | |
|