食屎啦你! Tik Ka「港產映畫」4吋雕像

文：MenClub 魏文青　　
POSTED ON 06 Jul 2017

本地藝術家「Tik Ka 迪嘉」嘅作品我哋之前都介紹過幾次，佢將外國流行文化融入香港本土文化中嘅創作方式確係別樹一格，又真係幾好玩。不過之前嘅作品都係以平面為主，就算你鍾意都好難拎上手「撚」下，但佢最新推出嘅「港產映畫」系列就唔同，除咗係雕像之外，最大嘅賣點就係「食屎啦你」！

冇錯，「港產映畫」系列係一套以港產電影中嘅經典場面為主題嘅4吋高雕像，以迪嘉嘅Q版幽默畫為藍本，再由LIGO DESIGN製作，真係睇到都開心哂。第一期「上映」嘅有《旺角卡門》中「烏蠅哥(張學友飾)」講嘅「食屎啦你」、《龍爭虎鬥》中李小龍踩死Robert Wall飾演嘅O'hara一幕、《少林足球》入面謝賢講嘅「球證、旁證、足協、足總、足委，全部都係我嘅人，點同我打呀」，以及《食神》入面劉以達飾演嘅方丈報上法號「夢遺」嘅一幕。

呢4隻雕像每隻$88蚊，不過發售日同方法都未定，想買就要留意迪嘉嘅Facebook。而喺黎緊嘅動漫節，迪嘉亦會喺場內展出原畫，大家到時入場就要留意下啦！
LIGO Design on Facebook Tik Ka From East on Facebook