【勢爭22連勝！】曹星如10月將迎戰日本拳手河野公平！！

文：MenClub Mr.波特　　圖：互聯網
POSTED ON 25 Jul 2017


自今年3月擊敗日本拳手向井寬史取得21連勝後，香港代表「神奇小子」曹星如亦即將迎來最新一場比賽。據最新嘅消息指，曹星如將會喺今年10月7日喺香港灣仔會展迎戰日本拳手河野公平，呢場比賽將關乎星如能唔能夠保持連勝至22場。

30歲嘅星如喺今年3月嘅時候，同日本拳手向井寬史進行比賽，最終取下其生涯第21連勝，繼續佢嘅傳奇之路。不過喺比賽過後，一眾拳迷已經期待緊星如下一場嘅對手會係邊個，而就係佢休息左差唔多4個月嘅時候，終於有消息啦，佢嘅對手就係36歲曾奪得WBA超蠅量級世界冠軍嘅河野公平。

今次星如嘅對手河野公平，生涯至今曾出戰43場比賽，合共取得32勝1和10負，表現唔算非常爆，但係亦都算係實力相當嘅選手，而佢曾奪得WBA超蠅量級世界冠軍亦代表佢係冠軍級人馬，所以唔好見佢大星如6歲就認為體能上佔優就可以輕鬆應對。當然，為左22連勝星如一定會全力應戰，佢喺上場比賽取勝後近日已經完成休養，目前正積極進行訓練，希望盡快操返起自己嘅狀態。

不過今次星如勢要有心理準備係一場持久戰，因為對手河野公平非常耐打，岩岩呢位日本拳手同巴拿馬拳手Luis Concepcion進行完比賽，雖然河野公平最終落敗，但係雙方就激戰左12個回合，最終要以點數分勝負，所以星如要想KO對手並唔容易，反而要諗定Plan B，即係究竟點樣可以靠點數取勝。
河野公平比賽片段：
如果10月呢大戰星如能夠再取勝，咁樣22連勝嘅佢將會增加佢喺下年3月計劃爭奪IBO超蠅量級冠軍嘅信心。作為香港人，梗係要為香港運動員打氣啦！Rex加油呀！！