【補飛！】「半人半神」Vince Carter將參戰姚基金慈善賽！

文：MenClub Mr.波特　　圖：互聯網
POSTED ON 28 Jul 2017


本來係香港即將舉行嘅體育盛事之一嘅姚基金慈善賽，較早前公佈參賽嘅NBA球員名單後，即引來大批球迷不滿及投訴，並唔少已購票嘅球迷都即時要求退票，對於今次事件主辦機購南華會即時作出「補飛」行動，成功請黎岩岩轉投帝王嘅NBA著名入樽王「半人半神」Vince Carter參與今次賽事。

之前大會公佈嘅姚基金慈善賽NBA方面嘅陣容，最多人認識嘅係騎士射手J.R. Smith，其次較為多人認識嘅相信就係勇士年輕球員Patrick McCaw、帝王中鋒Willie Cauley-Stein以及公牛嘅Bobby Portis，而餘下嘅球員就算你見到佢個名或佢個樣你都未必知佢係邊個。所以，今次賽事最貴門票達到＄7800，但換黎嘅陣容就只係連夏季聯賽嘅程度都算唔上，咁樣又真係好難同球迷交代。

眼見市件不斷發酵，越黎越多已買飛嘅球迷不滿，大會只可以即時作出補救，最終經一輪邀請之後，終於成功邀請一位雖然係老將，但就相信係今次參賽陣容入面最受歡迎嘅球員，佢就係曾勇奪2000年入樽大賽冠軍嘅「半人半神」Vince Carter。雖然Carter今年已經40歲，但係佢喺比賽入面都仲係有心有力，甚至上季更試過單場砍下24分，兼且命中率更達到100％，所以佢嘅實力仍然係相當高的！

加入Carter呢位曾經嘅超級明星球員，相信大會應該可以暫時平息部份球迷嘅不滿，但係如果需要球迷咁樣退票先可以邀請到大牌球星黎，相信如果下年再搞嘅話門票銷請應該都會幾慘淡下，雖則呢場賽事都係為慈善，但係球迷入場都真係想睇球星，所以大會下次真係要識做呢。

另外，J.R. Smith喺較早前已經率先黎到香港，喺慈善賽之前佢將會聯同其他球員一同參加唔同嘅活動，但係勇士嘅McCaw就好似話突然有事黎唔到香港參賽，相信部份勇士迷又會有啲失望。唔知黎緊幾日，你地又會唔會有機會喺香港撞到呢班球星呢？