【尊敬！】NBA著名球證Danny Crawford宣佈退休

文：MenClub Mr.波特　　圖：互聯網
POSTED ON 04 Aug 2017


單聽Danny Crawford呢個名，你可能唔知佢喺邊個，但係當你見到佢個樣，我諗作為NBA球迷嘅你一定認得佢。無錯，佢就係NBA其中一位球證，而NBA官方球證聯盟近日就宣佈，呢位傳奇球證正式退休。

Danny Crawford現年63歲，係NBA最有名嘅球證之一，甚至可以話係NBA入面最受人敬重嘅球證。Crawford由1984-85球季開始進入NBA成為球證，之後一直執法至2017年，一共32個球季，期間佢一共吹超過2000場常規賽、超過300場季後賽，以及超過30場總冠軍比賽，可以話佢嘅執法履歷佢敢認第二無人敢認第一。

而NBA之前亦曾經做過一次調查，發現Crawford係一眾NBA球員最順服嘅球證，可見佢喺NBA嘅地位有幾高。就好似今年NBA總決賽第四場，外界大肆批評球證嘅判決，認為當日球證嘅判決有如災難一樣。之後為左挽回球證嘅顏面，Crawford親自上陣，最終見證勇士成功奪冠，而外界對當日球證嘅判決亦表示讚賞，可見Crawford嘅作用有幾大。

如今Crawford宣佈退休，亦代表今年勇士與騎士嘅第5戰總決賽係佢生涯最後一場執法嘅賽事。不過其實佢仍然有心有力，如果佢想絕對可以再吹多幾年，不過佢就希望可以喺咁嘅狀態下離開，而唔想等自己表現下滑先再退落黎。如果真係咁，唔知如果NBA黎緊一季球證表現未能令人滿意嘅時候，佢會唔會出山去穩定軍心呢？

近年NBA老一輩嘅球證紛紛退落黎，好似現年77歲嘅Dick Bavetta喺2014年退休，而綽號「光頭球證」嘅Joe Crawford亦喺2015年宣佈退休，不過佢退役嘅原因係自己膝頭有傷，所以唔再適合繼續執法。

如今Crawford退休後，NBA最老資格嘅球證就係Ken Mauer，呢位62歲嘅球證喺NBA已經吹左31個球季，僅比Crawford少一季。再次後就係足左30個球季嘅Ron Garretson，呢位球證只有59歲，相信仍然可以吹多好幾年的。