【歷史最貴】侯斯頓火箭22億美元易主！

文：MenClub 波特先生　　圖：互聯網
POSTED ON 06 Sep 2017

今年夏天NBA嘅休賽期可以話喺相當精彩，除左球員交易、重磅簽約之外，近日最受關注嘅相信就係火箭隊正式易主！火箭隊原來嘅老闆Leslie Alexander今年傳出有意出售球隊，隨即引來多位買家接觸，最終侯斯頓當地富豪Tilman Fertitta以22億美元完成收購，成為火箭隊、James Harden及Chris Paul等人嘅新老闆。

自從火箭原老闆Alexander提出有意出售球隊後，經過1個多月同多方商談後，佢最終決定將球隊賣比Fertitta，價錢為22億美元。22億美元嘅收購價隨即刷新NBA球隊買賣嘅新高，此前嘅紀錄為2014年Steve Ballmer以20億美元從因種族歧視被迫賣掉球隊嘅Donald Sterling手上收購快艇。

火箭原老闆Alexander喺1993年7月以8500萬美元買下火箭隊，然後適逢Michael Jordan首次退役，喺「大夢」Olajuwon嘅帶領下成功連奪兩屆總冠軍，然後「姚麥組合」亦令火箭更加廣為人知，特別喺姚明嘅關係令火箭深受中國球迷喜愛。黎到近年，火箭喺James Harden嘅帶領下成為西岸前三強隊之一，今夏更加成功得到Chris Paul加盟，令人更加期待球隊新球季嘅表現。而喺最新《福布斯》2月份公佈嘅資料顯示，火箭隊嘅估價為16.5億美元，所以今次嘅新老闆可以話用超過數億美元嘅溢價黎收購火箭的。

火箭新老闆Fertitta現年60歲，佢喺全美最大餐飲企業之一Landry's, Inc.嘅老闆，其淨資產目前為31億美元。除左餐飲業之外，Fertitta嘅生意亦涉足唔同範疇，其中包括賭場、酒店、娛樂及體育。

對於能夠成為火箭隊嘅新老闆，Fertitta感到非常榮幸及高興，因為呢個係佢嘅夢想之一。而值得一提嘅係，火箭原老闆Alexander其實已經認識Fertitta多年，而佢認為Fertitta係火箭隊新老闆最適合嘅人選。