【隨時被遣返】北韓小將韓光成被祖國威脅！

文：MenClub 波特先生　　圖：互聯網
POSTED ON 28 Sep 2017

你可能會以為北韓嘅球員能夠出國為其他國家嘅球隊效力，一定好自由好高興，因為佢地唔使喺一個處處受到限制嘅國家入面生活。不過，事實又係咪咁呢？相信呢個問題，目前效力意乙球隊佩魯賈嘅北韓球員韓光成應該最清楚。

現年19歲嘅韓光成，2015年就到意大利球隊卡利亞里試訓，其後成功獲得機會，成為首位喺意甲征戰嘅北韓球員。而今年夏天，韓光成被球隊外借至意乙球隊佩魯賈，並開始取得成功。至今佢已經喺7場比賽攻入5球。

而眼見呢北韓小將表現咁出色，意大利國家電視台就邀請佢上一個電視節目，同時因為佢嘅人氣旺盛，亦有唔少意國美女邀請佢一齊影相。正當呢位北韓小將正享受自己嘅成功之際，佢收到黎自祖國北韓嘅電話，電話內容令佢接近崩潰。

據消息指，韓光成收到黎自北韓嘅電話，並警告佢要收斂自己的舉止，否則佢將會被遣返回北韓。對於祖國嘅警告，韓光成不能不從，因為佢嘅父母都喺北韓生活，所以要是佢唔聽話嘅話，佢嘅父母將必定受到威脅，而佢自己亦將可能需要返回北韓。

喺祖國嘅威迫下，韓光成只能夠默默忍受，佢喺意大利唔可以再咁高調，而喺國家嘅壓力下，佢嘅表現亦大幅下跌，近期嘅入球數量大跌，令人擔心佢嘅情況。