C朗大熱奪得FIFA世界足球先生！

文：MenClub 波特先生　　圖：互聯網
POSTED ON 24 Oct 2017

2017年國際足協(FiFA)頒獎典禮，尋晚喺英國倫敦舉行，各大足球巨星都有出席，其中最受關注嘅獎項當然就係FIFA世界足球先生，而宣佈結果前基本上大家都知道只會有兩位球員競爭，佢地就係C朗拿度同美斯，而今屆C朗則更加係大熱中嘅大熱。最終，C朗以超過4成嘅投票率再次奪得世界足球先生寶座！

由於2016年9月嘅時候，FIFA決定同《法國足球》終止合作關係，因此世界足球先生同歐洲足球先生將再一次分開，而今屆就係雙方分開後第二次舉行嘅頒獎禮。各個獎項嘅產生，係由各國家隊隊長、各國家隊教練、媒體代表及公眾一同投票選出來的，其中以上四個群體各佔25%權重，最終世界足球先生最後三強分別係C.朗拿度、美斯以及尼馬。

上季C朗拿度帶領皇馬成為歐聯改制後首支成功衛冕嘅球隊，而喺西甲佢又助皇馬阻止巴塞衛冕，另外皇馬亦都同時奪得世冠盃冠軍。黎到今季，皇馬喺季初已經奪得歐洲超級盃同西班牙超級盃。而個人表現方面，C朗上季參加46場比賽攻入42球，效率雖然有點下跌，但仍然係世界最級別的入球機器之一。

而三強嘅另外兩位美斯同尼馬，雖然佢地嘅表現都相當唔錯，但係球會榮譽方面卻比唔上C朗，國家隊表現亦未有太突出嘅表現，因此相比之下C朗明顯要優於兩位。

最終，C朗拿度獲得43.16%支持率，而美斯及尼馬則分別獲得19.25%及6.97%支持率，C朗成功5奪獎項(包含金球獎合併時期)，追平美斯！



另外，以下為世界最佳11人陣容：

門將：保方(祖雲達斯) 後防：丹尼爾艾維斯(巴黎聖日耳門)、沙治奧拉莫斯(皇家馬德里)、邦路斯(AC米蘭)、馬些路(皇家馬德里) 中場：摩迪(皇家馬德里)、卻奧斯(皇家馬德里)、恩尼斯達(巴塞隆拿) 前鋒：美斯(巴塞隆拿)、C朗拿度(皇家馬德里)、尼馬(巴黎聖日耳門)