【歷史性決定】艾巴辭退技術總監，全心扶正干地！

文：MenClub 波特先生　　圖：互聯網
POSTED ON 08 Nov 2017

作為英超嘅衛冕冠軍，車路士目前錄得7勝1和3負，排名聯賽第4位，呢個排名對於開季初期嘅佢地黎講已經算係相當唔錯，要知道藍軍今季開季嘅時候領隊干地一度處於嚴重唔夠人用嘅情況，而出現呢個問題好大程度上都係關技術總監伊文拿路(Michael Emenalo)事。

自從油王艾巴入主車路士，球隊嘅轉會事宜基本上全部都係交比技術總監負責，而伊文拿路喺2011年就坐上左呢個位置。無論教練有幾唔鍾意或幾想買一名球員，到最後話事嘅都只會係伊文拿路。而今個夏天馬迪轉會曼聯一事，車路士被外界給予極差嘅評價，這差唔多可以話助攻曼聯去挑戰英超冠軍。

正當唔少人都認為車路士呢個買賣球員由技術總監話事嘅局面會繼續落去嘅時候，老闆艾巴突然將伊文拿路辭退，而同時亦無任何消息說明球隊會有新嘅技術總監，因此艾巴呢個舉動明顯係為左加強干地嘅威信，佢情願送走自己最信任嘅左右手，都想扶正干地。雖然買賣球員嘅主要職務會落入艾巴另一位親信手上，但係干地嘅話語權將會大大加強，咁樣知道球隊需要嘅領隊干地將可以更有效咁提升球隊陣容。

另外，今個夏天干地同迪亞高哥斯達嘅不和事件動搖左干地喺隊內嘅威信，而如今無左技術總監呢個位置，干地對於球員嘅去留可以有更多嘅聲音，而球員為左留隊將需要進一步配合領隊干地，咁樣將可以令干地治軍變得更有效率。