朗拿度：「巴塞總係不善對待巴西球員。」

文：MenClub 波特先生　　圖：互聯網
POSTED ON 29 Dec 2017

今年夏天，巴黎聖日耳門以天價2.2億歐元從巴塞隆拿簽走巴西球星尼馬，雖然呢位巴西當家前鋒無論喺法甲還是歐聯都有出色表現，但係離開巴塞都係令唔少人感到婉惜。對於尼馬離開巴塞，巴西傳奇「外星人」朗拿度認為「地上最強」總係不善對待巴西球員。

朗拿度作為歷史上最佳前鋒之一，佢喺1996-97球季曾短暫效力巴塞隆拿1年，雖然當季佢個人喺49場比賽攻入47球之多，但由於佢同球會傾談續約時發生問題，最終雙方不歡而散，朗拿度因此以當時破世界紀錄嘅1950萬鎊轉投意甲嘅國際米蘭。

其後，朗拿度又從國米重返西甲，不過今次加盟嘅卻係巴塞死敵皇家馬德里。對於自己分別效力過巴塞及皇馬，朗拿度認為自己雖然喺巴塞度過完美嘅一季，但佢宜家更樂於同皇馬保持聯繫。不過朗拿度亦承認，自己離開巴塞當中亦有自己嘅錯誤。

而睇番尼馬離開巴塞，雖然呢位前鋒無親口承認，但係外界一直都推斷佢離開巴塞嘅主要原因，係佢無得到應有嘅尊重，因為球隊所有精神都只會放喺美斯身上，呢一點令逐漸成熟嘅尼馬開始想自立門戶，唔想再活喺美斯嘅陰影下。

雖然朗拿度認為當日離開巴塞部份係因為自己嘅問題，但係事實上巴塞咁多年黎都真係有唔少當紅球星會離隊他投，其中巴西球星亦佔大多數，而朗拿度亦留意到呢一點：「呢個情況已經發生左一段時間，巴塞管理層就曾經對羅馬里奧做過相同嘅事，其後朗拿甸奴亦都一樣。不過喺我心目中巴塞隆拿仍然係一個美麗嘅城市及一支美麗嘅球隊。」照咁睇，朗拿度見到尼馬嘅經歷，回想起佢當日離開巴塞，其實都係充滿感慨。