不要玩阿樂！日網民自製「阿樂死姿」筷子架

文：MenClub 魏文青　　
POSTED ON 12 Mar 2018

《龍珠》入面嘅阿樂被比達同立巴嘅培植人瞬間炸死，多年黎都被日本網民瘋狂取笑，就連Bandai近年都出過兩隻Figure黎「表揚」佢嘅「英姿」。如果你嫌咁都唔夠絕，日本有網民仲親手整咗個「阿樂死姿筷子架」，真係有心機呀！

日本網民「ゆきむし」一直都有喺「NICONICO」上載自己以黏土製作不同Figure嘅影片，而原來早於上年6月，佢就以黏土造出一個「阿樂死姿筷子架」。佢睇出「阿樂死姿」腰間部份好適合放筷子，於是首先用石粉黏土造出一個方塊，乾咗之後就以鉛筆橫出構圖，然後將整個阿樂雕出黎，之後再加上塗裝及光油，就成為一個筷子架。最抵死係漫畫原作中，阿樂條屍隔離其實仲有隻培植人嘅手。「ゆきむし」就將佢整埋出黎放牙簽！網民們睇到都話想買呀！

呢個「阿樂死姿」筷子架應該都唔會有量產，如果大家想要睇黎都要自己整一個，詳情就可以去睇「ゆきむし」條片，佢都有好仔細地介紹究竟用咗咩材料架。