【真．世界第一組合】費達拿將再次聯手比爾蓋茨參賽！

文：MenClub 波特先生　　圖：互聯網
POSTED ON 02 Feb 2018

網球名將「瑞士天王」費達拿近日岩岩喺澳網成功衛冕，奪得其生涯第20個大滿貫，係網壇史上首位做到嘅球手。而黎緊「費天王」將會夥拍另一位「世界第一」球手參加比賽，而呢位「世界第一」就係世界第一首富比爾蓋茨(Bill Gates)。

今次費達拿同蓋茨聯手參賽，係為到「為非洲而戰慈善賽」出一份力的，二人將會組成雙打組合與另外一對雙打組合Jack Sock及Savannah Guthrie進行友誼賽。

事實上今次並唔係費達拿同蓋茨首次聯手，二人去年亦都為到同一個慈善賽合作出戰，當時佢地嘅對手係John Isner同Mike McCready，最終「費蓋組合」以6：4擊敗對手。

對於今次慈善賽，費達拿同蓋茨都可以話不遺餘力，佢地二人更一同拍攝左一段宣傳片，可以睇到作為世界首富嘅蓋茨都粉墨登場，甚至搞下笑，實在相當難得。

現年62歲嘅蓋茨作為微軟最大嘅股東，佢嘅身家喺2017年達到860億美元，自2014年以來一直都係世界首富。