每代《Monster Hunter》（芒亨）推出，都總會吸引到大班玩家相約集體「屠龍」。就算近年手提遊戲機愈來愈少人玩，芒亨依然能打破宿命，吸引玩家拿起已封塵的手提機，再次化身「屠龍友」，上星期正式推出的《Monster Hunter 4G》也不例外，揮低了一眾家用機遊戲。今次屠龍熱潮，你投入咗未？

高興見番舊朋友
想體會屠龍的樂趣，當然要請屠龍友開心share，今次筆者就請來由PS2第1集已經開始玩的阿聰來講幾句。事前他已經勁期待《MH 4G》，遊戲於上周四一偷跑開賣，他便立即入手，之後日日3DS LL不離手，就連返工時，只要一得閒就會拎出來劈幾吓。他劈頭第一句就是：「今集有番砂龍、一角龍、盾蟹呢啲PSP年代嘅魔物，好似見番啲舊朋友咁！」看見阿聰說這句時的笑容，我完全體會到fans玩《MH 4G》的興奮程度。

但其實這遊戲出了咁多集，今集又只係強化的第4代「G版」，阿聰也坦言玩法根本同前幾集沒有分別，只當係上集的延續，將遊戲繼續玩落去，吸引他的除了感情，更重要的是聯誼成分。「你問我最好玩係乜？我真係答你唔到，只要同一班friend一齊玩，就乜都好玩㗎啦！」而且因上集《MH 4》已經支援Wi-Fi網上線，阿聰更可以隨時隨地組隊屠龍，「起碼唔使成班人坐麥記囉。」

魔物變強更難打
不過，阿聰玩落也發現今集在操控上比上集有些微改進，「譬如上集已經可以騎上條龍上面打到佢條bar冇晒血，睇住佢瞓直，今集更加有得用大武器打起個人，再騎上條龍。」多了這些連續技，本來開始時阿聰覺得遊戲是易玩了，但隨着遇到的魔物愈來愈強，他才察覺到實質是難玩了。「有時明明睇見佢哋啲功擊力同HP都唔係好勁，點知啲連段攻擊超強，有時真係避都避唔切。」

雖然香港玩家玩得芒亨，十居其九都係掛住連線屠龍，但是阿聰也說不錯過今集的村任務。「因為今集就算唔連線，村入面都會有G任務玩，有啲仲要係唔喺村入面開嚟玩咗嘅話，連線嗰陣就唔會有，冇得唔玩。」

玩家阿聰

《Monster Hunter 4G》
3DS
日本版　$398
亞洲版　$368

3DS LL升價
正因為有大量像阿聰一樣的fans，所以聽聞旺角有game舖在《MH 4G》開賣後5日，已經賣出千幾隻game；更因不少屠龍友手上本來沒有3DS，需要買機來為玩一隻game，以至有些game舖在這幾天中便售出數十部3DS LL（平日可能一個月只賣到幾部），再加上近期日本遇上颱風關係，搞到3DS LL供不應求，機價升了數百元。但隨着這星期將有新貨陸續運到，相信機價會稍為回落，未入手加入屠龍行列的朋友，是時候動手了。

同場加映
《Monster Hunter 4G》配件一覽

《Monster Hunter 4G》特別版3DS LL　$2,599

《Monster Hunter 4G》e-CAPCOM限定版遊戲（連figure）　$950 

擴大掣　$199