【又變？】世界羽聯將減少場邊教練數目？！

文：MenClub 波特先生　　圖：互聯網
POSTED ON 05 Mar 2018


一個運動項目修例大多數都係為左令該項運動變得更加好及吸引更多觀眾觀看，而近年世界羽毛球聯會就積極求變，但佢地嘅改變卻令選手們非常不滿。

世界羽聯近年推行嘅修例包括: 將3盤2勝21分制嘅賽事變成5盤3勝11分制；將發球高度從腰部統一變成不得超過115cm。如今，佢地又希望將場邊教練嘅數目減少。

對於3盤2勝21分制變成5盤3勝11分制，每一局嘅比賽速度將會提高，並要求選手要更快入局。對於呢個決定，唔少人認為係聯會希望增加局與局之間嘅廣告機會，從而獲得更大收益。

而發球高度就將原本擁有身高優勢嘅選手，一下子變得難以習慣去發球，大大削弱身型較為高大嘅國家選手，就好似目前世界一哥丹麥嘅Viktor Axelsen，其身高就超過1.9m。

如今減少場邊教練數目，則更加令人摸不著頭腦，要知道教練係最熟悉球員嘅人，佢地會為球員建議戰術，以至協助佢地調整臨場發揮，所以可以話係非常重要嘅人物。就呢次修例，唔少球手已經提出抗議，但以世界羽聯嘅強硬態度，睇黎羽毛球呢項運動黎緊都將會有住巨大嘅衝擊了。