【捕追不到了...】杜奧巴&卡域克今夏一齊退役！

文：MenClub 波特先生　　圖：互聯網
POSTED ON 13 Mar 2018

球員年華老去而選擇退役係不能避免嘅現實，而今年夏天就有兩位英超名將決定掛靴，佢地分別係車路士名宿「魔獸」杜奧巴及曼聯隊長卡域克。

早喺去年11月，現年40歲嘅杜奧巴已經宣佈自己會喺今個賽季結束後退役，而今次佢進一步確認今夏退役嘅消息。杜奧巴認為自己已經40歲，所以係時候退落黎，而佢目前仍然喺美職二級聯賽以球員兼老闆嘅身份踢緊波，佢亦直言享受呢種身份，又可以不時傳授經驗比年輕球員。

呢位英超著名射手2004年加盟車路士，效力左8個球季，上陣左341場攻入157球，為「藍戰士」帶黎1次歐聯冠軍、4次英超冠軍、4次足總盃冠軍、3次聯賽盃冠軍及2次社區盾冠軍。

離開車路士後，杜奧巴曾到唔同地方踢波，其中包括中國、土耳其、加拿大以及美國，其中亦包括一次重返車路士一季。唔好睇杜奧巴已經40歲，佢喺美國仍然保持出色嘅入球能力，喺2017賽季入面，佢上陣14場比賽竟然攻入10球之多，效率難以置信地高。

另一邊廂嘅卡域克，今年亦都已經37歲，退役其實都係遲早嘅事，而佢近日就正式表態自己將會喺今個賽季結束後正式掛靴。

雖然作為曼聯隊長，但係卡域克其實都無乜機會上陣，今季佢就只曾上陣4場，因此無機會上陣嘅佢選擇退役亦絕對唔令人感到意外。

卡域克表示，雖然自己唔願意，但係退役呢一刻遲早都會到，而如今就係退落黎嘅時候。有指卡域克退役嘅其中一個原因係其心贓臟有問題，不過佢承認自己已經克服左，但係經考慮之後都係決定退役。

2006年夏天，卡域克由熱刺轉投曼聯，至今已經效力至第12個球季，其為曼聯嘅上陣次數超過460場，攻入24球。退役後，卡域克表示自己將好大機會進入曼聯嘅教練組，雖然事情仲未100%確定，但相信應該無問題。