【18個月的等待】辛迪卡蘇拿終於復操！

文：MenClub 波特先生　　圖：互聯網
POSTED ON 03 May 2018

辛迪卡蘇拿呢位中場球員，作為阿仙奴球迷絕對可以話係既熟悉又陌生，熟悉嘅係佢曾經係球隊技術最好嘅核心球員之一，但同時因為受傷佢已經休養多達18個月，能唔能夠再次復出都令人質疑。不過最新嘅消息指，卡蘇拿已經傷癒啦！

33歲嘅卡蘇拿，自從2016年10月腳踝受傷後，至今已經缺陣18個月，中間缺陣嘅比賽場數已經接近100場。而咁長嘅休養時間期間，卡蘇拿嘅情況可以話起起伏伏，一直未能斷尾完全康復。

不過，最新嘅消息指卡蘇拿已經接近復出，近日佢已經可以開始進行有球訓練，而佢不論控球技術、盤扭、傳球嘅情況都看似非常出色。當然，卡蘇拿無可能咁快就可以復出踢比賽，佢仍然需要尋拎比賽狀態，特別係體能上需要重新適應，話晒33歲都已經唔再年輕。


話又說回頭，其實卡蘇拿嘅傷勢曾經非常嚴重，因為進行手術期間傷處受細菌感染，主診嘅醫生曾一度考慮幫佢截肢，否則可能性命不保，幸好最終條命仔無事，而隻腳亦都唔使切左佢。所以，如今卡蘇拿仲可以喺場上踢波，甚至未來有機會重新上陣，呢一個都係幾咁令人鼓舞嘅消息！

希望卡蘇拿未來一切安好，期待佢復出再次上陣殺敵嘅一刻！