【係愛呀哈利】費Sir甦醒後第一句都係關於足球！

文：MenClub 波特先生　　圖：互聯網
POSTED ON 09 May 2018

足球對於唔少人黎講都係一種活動或興趣，有少部份人則會以足球作為事業，而呢班人當中相信唔少都會話自己非常鍾意足球，但係究竟真真正正鍾意足球嘅人其實係可以達到咩程度呢？呢一個答案喺前曼聯領隊費格遜費爵爺身上可能會搵到。

日前，因為突然腦出血而需要即時入院進行手術嘅費Sir，完成手術後情況已經穩定，較早前亦已經甦醒，情況未見大礙。不過睇番費Sir今次入院嘅情況，其實唔好話唔危險，稍有差池佢真係有性命危險。

最終大步檻過嘅費Sir已經醒番，情況穩定，球迷們唔使擔心。而當費Sir醒番之後佢第一句講嘅野，你可能會估佢有機會問「我昏迷左幾耐？」或「屋企人點樣？」，但作為一名資深嘅足球界人士，佢第一句問嘅野都係離唔開足球。

費Sir第一句醒番講嘅野就係問：「唐卡士打的比賽怎樣？」原來當日費Sir突然入院，令佢錯失左無得睇呢場比賽。單憑呢一點，真係可以睇得出佢老人家真係好鍾意足球，根本佢個腦入面就只有足球。

自小就已經接觸足球並成為球員嘅費格遜，一路走到今日都無離開過足球，直至1974年佢開始擔任起球隊教練，並喺1986年正式執教起曼聯，並成為足球界最成功嘅傳奇教練。76歲嘅佢如今雖然已經無左擔任球隊，但佢仍然心繫足球，並為曼聯繼續工作，燃燒自己最好的餘光。