今年爵士嘅星級新秀Donovan Mitchell相信已經帶比球迷們相當大嘅驚喜，雖然佢喺西岸次圈未能帶領爵士擊敗火箭晉級，但佢嘅表現已經令人印象深刻，特別係首圈領軍擊敗擁有三巨頭嘅雷霆。

今季Mitchell作為NBA新秀旋風嘅其中一個風眼，佢喺常規賽場均交出20.5分3.7籃板3.7助攻1.5抄截，帶領球隊打出48勝34負嘅戰續，排名西岸第5位。進入季後賽後，Mitchell火爆嘅表現更進一步，場均數據提升至24.4分5.9籃板4.2助攻1.5抄截，而無論係常規賽定係季後賽，Mitchell都係爵士嘅得分王，作為一名新秀可以交出咁嘅表現絕對唔容易。

如今爵士季後賽出局，一班球員提早放暑假，佢地可以去休息、去度假、去玩、去陪家人，又或者提前開始訓練。咁作為新秀嘅Mitchell當然係選擇最後一項，就係提早開始為來季作準備，而佢決定會重新睇番岩岩其新秀賽季90場比賽嘅所有錄像。

重睇比賽錄像對於球員黎講係一個非常好去提升自己嘅方法，因為你可以望清楚自己與對方嘅強弱點，再理解NBA比賽嘅流向，從而喺未來嘅比賽中應用出黎，要知道呢啲係作為一名新秀非常需要學習嘅野來的。

而再仔細睇Mitchell嘅數據，佢今季嘅投射命中率為43.7％，三分球命中率為34%，罰球命中率為80.5％，其中三分球明顯係佢需要進一步提升嘅項目，因為佢今季嘅三分命中率排喺55名分衛當中嘅第48名，要知道佢嘅出手次數達到550次，係分衛當中嘅第3位，所以可以證明佢仍然有好巨大嘅進步空間。

不過話又說回來，今季只係Mitchell嘅新秀賽季，但係佢已經展現出全明星級別嘅數據，亦正式登基成為爵士嘅第一核心，如果佢可以進一步提升自己，改善三分球，咁樣未來佢究竟可以變得有多強，實在令人相當期待！