相信大家睇開嘅運動比賽，大部份都係發生喺陸地或者海上面，而如果要你講一種運動係喺天上發生嘅，一時三刻你可能都未必即刻諗到。不過，事實上並唔係無呢種運動，Red Bull Air Race就係其中之一，而日前Air Race前世界冠軍機師Matthias Dolderer就途經香港，並連同賽事嘅香港代表機師Kenny接受左MenClub嘅訪問！

現年47歲嘅機師Matthias，由2009年就開始參加Air Race，期間佢都一直備受關注，最終直到2016年佢終於成功登上世界冠軍寶座，並且係史上首位唔使鬥最後一站就已經確保世界冠軍嘅選手。

而今次係Matthias首次黎到香港，佢對呢個地方有好高嘅評價，佢認為一個咁小嘅地方已經有齊各樣Life Style嘅野，而另一方面佢喺香港亦遇到佢嘅好朋友，所以對我地呢個地方感覺非常正面。

以下係我地同Matthias(M)及Kenny(K)嘅訪問:

問: 你覺得作為Air Race機師最重要嘅素質係咩呢?

M: 「你首先必須要懂得飛行，而由於飛機是非常精準的，同時體能及心理狀態都需要保持在好高嘅水平，心理質素需要有好好嘅訓練，你唔可以被任何傳媒、新聞、其他隊伍、其他任何人去令你分心。另外你都需要有好大量嘅事前準備，又要準備好你嘅頭腦、你嘅隊伍，當中經驗亦都係其中最重要嘅一環。」

問: 你覺得參加Air Race最大嘅困難係咩呢?

M: 「最大嘅困難係保持穩定，我地機師都係發揮99%嘅表現，因為如果當你發揮100%表現時，你就會非常貼近極限，呢個時候你就會相對容易出現錯誤，而錯誤將會令你有機會被罰時間，呢個可能係0.1秒、1秒、3秒，咁樣你就好大機會無法贏得比賽，所以贏同輸其實都係咫尺之間。」

問: 2016年你曾贏得世界冠軍，你覺得當時你係憑咩奪冠呢?

M:「2015年開始賽季嘅時候，我已經表現得很好，進入2016年後，我們最大嘅優勢係非常穩定，隊伍工作配合上堪稱完美，而我嘅飛機又飛得很快，我自己喺心態上又保持得好好，我無強迫自己一定要羸得冠軍，同時成功保持發揮99%表現，最終我成功一直保持穩定性，而其他對手則有唔同嘅失誤，所以我表現最好下，成功獲得了世界冠軍。」

問: 你今年的目標是什麼?

M:「每一年其實目標都係世界冠軍，但今年略有不同，我諗嘅係每一場比賽，所以我宜家諗嘅並唔係世界冠軍，而係黎緊喺日本嘅賽事。而當我喺日本完成比賽後，我就只會想下一場比賽嘅事。而我自己亦都只專注於自己，而不會花時間喺其他地方。」

問: 飛行運動與陸地或海面運動有什麼不同呢?

K: 「飛行運動與陸地或海面運動最主要嘅分別係，飛行運動係3D的，我地係可以上升及下降的，呢一點係最大嘅分別。」

問: 你係點樣接觸飛行運動的呢?

K: 「我13歲喺英國讀書嘅時候，喺個度學習揸飛機的，之後就因此愛上左飛行，並且每星期都到飛機場學習。18歲回到香港，幸運有航空公司願意培訓我，最終我成功拎到商業飛機牌。其後我自己再去學習花式，至今已經揸飛機揸左15年了。」

問: 你平時喺邊度練習的?

K:「作為香港飛行總會嘅會員，我平時會喺香港石崗進行訓練的。」

問: Air Race最困難的地方是什麼?

K:「我地飛行嘅速度差唔多達到370公里，飛嘅高度則大慨15米，所以同平常揸飛機的時候係完全調轉的，佢地平時揸得又高又慢，我地係揸得又低又快的，所以Air Race最困難嘅係喺咁細嘅環境下，我地仲要飛喺雪糕筒中，G-Force係非常大的。」

問: 比賽期間你在機倉中嘅感受係點嘅呢?

K:「我下一個比賽喺匈牙利進行，而比賽航道嘅右手邊有一個當地非常重要嘅建築物，但因為我地飛行速度達到370公里，所以就算個座建築物好巨大好搶眼，但係我地到時係會完全感受唔到呢類型嘅野，只會專注於自己嘅飛行航道。」

問: Air Race危險性大嗎?

K:「飛行運動係會有指定嘅危險，不過其實比賽大會方面睇安全係最重要的，唔單止係機師嘅安全，仲有觀眾嘅安全，我地係做左好多準備功夫去減少危險發生嘅風險。如果你話玩Air Race同揸電單車做比較，我每一次都會揀Air Race，我覺得揸電單車係更加危險的，因為好多危險已經喺我地控制範圍之內。」

問: 未來Air Race有機會在香港舉行嗎?

K:「香港係一個非常適合舉行Air Race嘅地方，呢個亦都係我自己嘅夢想，因為我好想香港本地嘅Fans能夠睇到呢項賽事。」