桌球界2017-18球季，喺馬克威廉斯奪得世錦賽冠軍後亦正式宣佈結束，各位球員進入休賽期，可以選擇休息或進行調整，以迎接新一季嘅到來。而總結呢一個球季，桌球界呈現上升嘅趨勢，現實啲黎睇各位球員獲得嘅獎金亦比以往多了不少。

今季，桌球界一共有34位選手獲得10萬鎊或以上嘅獎金，相比上季就只有22位球員，可以睇到明顯嘅上升，而其中最大嘅原因係唔同嘅比賽其獎金都提升左。綜合黎睇，桌球界今個賽季嘅總獎金為1331萬鎊，而上季嘅總獎金則只有1044萬鎊，亦即係話今季獎金方面一共增加左287萬鎊，增幅達到27.5％。

而睇番今季獲得最多獎金嘅球手為奪得世錦賽冠軍嘅威廉斯，佢一共獲得898,776鎊(世錦賽冠軍獎金為42.5萬鎊)，而排名第二嘅則係「火箭」奧蘇利雲，佢一共獲得888,000鎊，雖然佢地未能夠同上季嘅沙比相比(上季沙比一共獲得933,428鎊獎金)，但這75三傑嘅兩位，都已經創下佢地各自嘅生涯獎金紀錄，同時兩人單季獲得超過80萬鎊獎金亦都係歷史第一次。

另外，希堅斯今季獲得612,372鎊獎金，沙比則有565,085獎金，亦即係話今季一共有4位球員獲得50萬鎊或以上嘅獎金，要知道上季就只有2位而已。

今季桌球界獎金分佈情況：

> 40萬鎊獎金 - 9位(上季5位)

> 10萬鎊獎金 - 34位(上季22位)

> 5萬鎊獎金 - 61位(上季46位)

下季，世錦賽冠軍獎金就會提升至50萬鎊，桌球界認為一位球手單季獲得100萬鎊獎金已經近在咫尺，而全季總獎金佢地亦預期好快就可以達到2000萬鎊。

不過，其實相對其他運動，桌球手嘅收入可以話並唔高，好似足球同籃球，部份明星球員一季就已經可以獲得2-3000萬美元嘅工資，呢個距離可以話實在係差天共地呢！