過去7個球季，LeBron James都成功帶隊殺入NBA總決賽，其中助熱火奪得兩次總冠軍，而2016年則助母會騎士歷史性首次奪冠。不過黎到今季，騎士除左LeBron一人之外，其他球員好似都唔太給力，令球隊戰績不穩，雖然如今仍然成功打入東岸決賽，但經過今日一戰之後，佢地已經面臨被淘汰嘅邊緣。

現年33歲嘅LeBron作為「NBA第一人」，基本上整支騎士都係靠佢一人，但正因為咁樣佢休息嘅時間實在係少之又少，體能上嘅負荷甚至已經達到極限。今季常規賽，LeBron歷史性上陣全部82場比賽，場均上陣時間達到36.9分鐘，總上陣時間亦超過3000分鐘。

而進入季後賽後，LeBron上陣全部15場比賽，場均上陣時間升至40.7分鐘，亦即係平均一場就只有7.3分鐘係坐喺後備席的。

喺球場上，LeBron嘅表現仍然係萬人莫敵的，但係正所謂鐵人都會攰，LeBron喺比賽中可以話進攻防守都攬晒上身，隊友又無好表現，令LeBron體能黎到呢個地步已經接近耗盡。

睇下佢喺後備席休息時嘅表情，可以感覺到佢嘅疲累同無奈，佢付出晒所有體能，但奈何時光已經一去不返，佢已經唔再年輕，場均上陣40分鐘，仲要係季後賽級別嘅強度，佢仍然有咁嘅表現已經值得致敬，但係如果想反勝入總決賽，甚至要喺總決賽擊敗勇士或火箭，睇黎真係非常困難吧...