NBA日前舉行左一年一度嘅常規賽頒獎典禮，各大獎項最終塵埃落定，最受關注嘅年度最有價值球員MVP由火箭核心James Harden大熱當選，要知道喺Harden嘅帶領下火箭成為今季常規賽一哥，再加上其個人數據亦都非常亮眼，所以今次獲獎絕對係實至名歸。

就喺Harden成為MVP之後，其實唔難發現一個景象，就係昔日雷霆三少全部都成功獲得常規賽MVP寶座：Kevin Durant(2013-14)、Russell Westbrook(2016-17)及James Harden(2017-18)。

以上三位球員如今都是NBA當中的超級巨星，但昔日佢地其實都係效力同一支球隊 - 雷霆，並且被外界稱為大少、二少及三少。2007年雷霆以榜眼簽選上KD，其後又喺2008年以第4順位揀中Westbrook，最後喺2009年以第3順位揀埋Harden，不過為左平衡球隊攻守，所以Harden當時被安排出任第六人位置，令佢未能全面發揮自己嘅實實力。

雖然係咁，Harden喺2011-12球季仍然憑住後備嘅身份交出16.8分4.1籃板3.7助攻，獲得當年嘅最佳第六人獎項。而同年，雷霆憑住三位核心嘅帶領下，成功殺入NBA總決賽，可惜嘅係當時已經成形嘅熱火，被對方以1:4擊敗無緣總冠軍。

其後，由於當年雷霆薪酬面臨爆煲，所以球隊不得不選擇將Harden送走，就係咁Harden就到左火箭成為佢地嘅核心，而雷霆三人組亦從此消失。

得番雙少KD及Westbrook嘅雷霆，其實實力亦都算係NBA當中頂級的，其中KD更喺2014年成為常規賽MVP，但係佢地就係始料打唔入總決賽，其中最接近嘅一次就係2016年，當時雙少成功帶隊打入西岸決賽，但好可惜喺大好形勢下竟然被勇士逆轉成功，錯失再次打入總決賽嘅機會。而就喺呢次失諸交臂下，KD決定離開效力多年嘅球隊轉投勇士。

就喺KD離隊後，雷霆單靠Westbrook一人撐起，而佢喺2016-17球季就打出瘋狂嘅表現，以場均大三元完成賽季，追平歷史，並順利壓倒Harden首奪MVP！

回望昔日雷霆呢三位球員都係非常出色的，每個都各有特色，如果佢地仍然一齊效力雷霆，相信奪冠絕對係指日可待。不過，亦都可能因此球員嘅上限會被封頂，咁樣大家就唔會見到如今MVP級別嘅Harden啦！點都好，回憶幾時都係美好的....