今晚，俄羅斯世界盃四強賽事將會展開，第一場將由法國大戰比利時，由於兩支都係今屆賽事嘅奪標大熱門，所以呢場對決外界評為提前嘅決賽，即係話呢場勝出嘅一方隨時就係今屆世盃嘅冠軍。不過，喺呢場對決入面，有一個人卻處於非常尷尬嘅位置，佢就係法國傳奇射手亨利(Thierry Henry)。

作為法國傳奇射手，現年40歲嘅亨利大帝為法國隊立馬唔少汗馬功勞，其中包括助法國隊奪得國家史上唯一一次世界盃冠軍(1998年)，另外仲有1次歐國盃及1次洲際國家盃冠軍，而佢個人則代表法國隊上陣123場(隊史第2)攻入51球(隊史第1)。

眼見法國隊成功再次打入世界盃四強，相信亨利心入面一定非常高興，不過今一屆對於佢黎講心境上可能有啲唔同，甚至好矛盾，因為呢位傳奇射手喺2016年8月時候應邀加入成為比利時國家隊嘅助教，亦即係其祖國法國會係佢地黎緊四強嘅對手。

2016年嘅時候，比利時國家隊領隊馬天尼斯邀請亨利加入其教練團，以其傳奇射手嘅經驗去訓練球隊嘅一眾射手，其中包括盧卡古、夏薩特、迪布尼等等。雖然亨利應該已經有心理準備有朝一日會對上自己嘅祖國，但係當真係要面對嘅時候，相信其心情都一定會非常複雜。

不過，其實足球壇上為另一個國家打自己祖國嘅例子亦唔少，其中好似2014年世界盃，德國「金色轟炸機」奇連士文就係美國隊嘅教練，而咁岩小組賽美國就分到同德國隊同組，奇連士美需要帶隊面對祖國，雖然最終美國隊以0:1不敵德國，但雙方則攜手晉級16強。

除此之外，去年代表玻利維亞出戰世界盃外圍賽嘅射手摩蘭奴(Marcelo Martins Moreno)，本身擁有巴西血統，甚至代表過巴西U18出賽，不過最終未能入選大國腳，所以轉為代表玻國。而玻利維亞對上巴西嘅世盃外圍賽，摩蘭奴就著住玻國球衣同一班巴西國腳好友黎一張大合照，係一個非常罕見嘅場面。

所以，今晚各為其主，亨利一定會盡自己努力去助比利時擊敗法國，但當然如果最終法國隊能夠晉身決賽，相信亨利自己亦都會相當高興的。