之前都有提過因為《週刊少年Jump》50週年紀念企劃，所以冨樫好乖咁兌現年內復刊呢個承諾，但一眾讀者追咗《HUNTER×HUNTER》咁耐，又點會唔知冨樫死性，畫多一排咪又係因為打機打到腰痛要休刊！不過家下佢除咗打機之外，仲多咗追星呢個興趣，繼之前2018年年頭「櫸坂46」日本武道館公演上佢親自到現場送祝賀花籃，以及喺單行本入面搞咗個關於「櫸坂46」嘅gag之後，最近又見到佢沉迷於「櫸坂46」嘅新證據！

就喺8月24日，「欅坂46」知名歌曲《不協和音》嘅作曲編曲組合バグベア喺Twitter上公開咗同冨樫義博喺「欅坂46」夏季巡演Live上嘅紀念合照，仲勁開心咁一齊擺晒「欅坂46」嘅知名甫士「サイマジョポーズ」！認真得戚！

可見冨樫平時打機都已經拖慢晒進度唔畫稿，而家腰痛都仲要得閒追星唔得閒畫稿，相信距離《HUNTER×HUNTER》大結局嘅日子又再遠咗……