2017-18球季歐洲最佳入球係邊一球？相信上季有睇波嘅10個有9個半應該都會揀C朗拿度喺歐聯面對祖雲達斯嘅世紀倒掛，而結果就係呢一球亦透過投票真正成為呢一季歐洲最佳入球！

上季歐聯八強首回合皇馬作客祖雲達斯嘅比賽入面，C朗拿度接應右閘卡華積嘅傳中，以戴志偉嘅絕招倒掛金勾成功射破保方嘅十字關，呢球嘅精彩程度係連被破門嘅保方都認唔住舉起姆指比Like呢位對手。

較早前歐洲足協方面就投過網上投票選出2017-18球季嘅最佳入球，最終有接近34.7萬嘅球迷投票，而C朗呢球倒掛有就19萬多嘅球迷支持，可以話係壓倒性咁贏到呢一個最佳入球嘅殊榮。

而排名第二嘅，係黎自法甲球隊馬賽嘅中場皮耶，佢呢一球先以插花晃開防守球員，再以腳面片射入網。排名第三嘅，則係西班牙女子U17足球隊成員拿華路，佢先喺禁區頂Cup過防守球員，其後再避開另一名防守球員，最後射出一記彩虹射球越過門將成功破網。

第1名：C朗拿度（祖雲達斯0：3皇家馬德里）197,496票
歐聯八強第一回合，日期：03/04/18

歐洲足協技術觀察員：技術及運動能力表現非凡

第2名：皮耶（馬賽5：2 萊比錫）35,558票
歐霸盃八強第二回合，日期：12/04/18

歐洲足協技術觀察員：在重要時刻，一個出色的運球及腳面射門

第3名：拿華路（德國0：2西班牙）23,315票
歐洲U17女子青年錦標賽決賽，日期：21/05/18

歐洲足協技術觀察員：用靈活的腳步擊敗防守者後，射出一記美麗的彩虹射球