傳奇短跑選手「閃電」保特，雖然在去年8月正式退役，但佢並無消失喺眾人眼前，因為佢雖然離開左田徑賽，但就轉戰足球場，成為澳職嘅職業足球員。不過，保特始終係一位跑手，只要有得跑相信佢都會毫不猶疑參加，特別係有機會創歷史。

日前，保特獲邀請到一架特殊空中巴士，呢架空中巴士特別設計成內裡為零重力，以模仿太空嘅實際情況。保特喺呢架空中巴士上，更與兩名乘客進行一次短跑挑戰，而兩位挑戰保特嘅乘客係邊個？佢地分別係法國太空人Jean-Francois Clervoy(藍衫)及Novespace CEO Octave de Gaulle(黑衫)。

而比賽正式展開，保特以慣常嘅起跑動作作準備，當比賽開始保特與平時嘅比賽一樣，並未一馬當先，甚至一度喺地上打滾，不過當跑返轉頭嘅時候，後勁凌厲嘅佢大幅領先，並以招牌動作「拍心口」衝線。

就係咁，保特成為首位太空賽跑嘅冠軍，唔知遲下地球會唔會需要佢出山挑戰外星人呢？