當執教球隊多年嘅前領隊費格遜退落黎之後，可以睇到「紅魔鬼」曼聯直到今日，無論係「天才」莫耶斯、雲高爾，甚至如今的摩連奴，都未能幫助呢支英超班霸重拾過去聲威。而上季得知「雲爺爺」雲加終於宣佈退落黎後，相信唔少廠迷個心都又驚又喜，佢地擔心嘅係究竟球隊會唔會步曼聯後塵呢？

要知道當一位教練長期執教一支球隊後，佢所建立嘅文化會大大影響球隊，當然仲有佢嘅權威及震攝力都唔係新教練可以輕易取代的。不過當雲加離開，新教練艾瑪利正式執教起阿仙奴後，佢卻為一眾廠迷帶黎驚喜！

季初兩場強強對碰連續不敵曼城及車路士，令人質疑艾瑪利係咪阿仙奴嘅真命天子。不過，喺呢兩場落敗之後，計埋尋日歐霸盃擊敗士砵亭，阿仙奴已經錄得一波11連勝，當然對手可能未算係頂級強隊，但係能夠咁長時間保持佳態，係近年雲加手下期間難以見到的。

如今嘅阿仙奴與雲加後期執教嘅阿仙奴最大嘅分別係咩呢？係自信！如今艾瑪利手下嘅阿仙奴踢出黎嘅足球極具自信，與以往軟到不得了嘅阿仙奴相比完全係脫胎換骨，其中有阿仙奴球員直言艾瑪利同雲加嘅唔同係，佢比足夠機會球員展現自己，令球員自身相信自己嘅能力。

另外，令球隊陣容變得攻守平衡係艾瑪利到任嘅重中之重，過去雲加手下嘅阿仙奴防守經常出現問題，但如今適當嘅排陣同用人得宜下，阿仙奴已經大大減少好似以往嘅失球。

如今阿仙奴英超已經5連勝，雖然暫列大家好熟識嘅第4位，但距離榜首曼城其實就只有2分之差，以佢地如今嘅狀態，來季將有好大機會可以重返歐聯，甚至再一次挑戰英超冠軍也絕對不無可能。有機會挑戰英超冠軍當然令球迷高興，但係球隊能夠喺經歷換帥下步入正軌，呢一點可能更加更加重要。