現今足球壇嘅最佳球員，相信都是不下美斯及C朗拿度二人，而如果係計算歷史最佳球員，有人大膽認為美斯有能力登上呢個寶座。不過，亦都有人相當唔同意呢個睇法，佢就係人稱「球王」嘅巴西傳奇球員 - 比利(Pele)。

對於美斯會否係歷史最佳球員，78歲嘅比利並無直接回應呢個問題，佢首先表示呢個係一個人嘅口味問題。不過，比利之後卻給出自己嘅睇法：「你如何比較兩位球員，一位左右腳都可以射門，並且頭搥了得，另一位則只有一隻腳可以射門、只有一種技術及頭搥不行？」明顯比利講緊「只有一隻腳可以射門、只有一種技術及頭搥不行」嘅應該就係美斯。

而比利亦都補充讚揚其球王級主要競爭對手馬勒當拿，比利：「馬勒當拿比美斯出色？對，好上不少。」

雖然比利咁講係說明美斯無可能比得上自己，但其實早喺2015年嘅時候，比利曾讚揚美斯係過去10年最出色嘅球員。

其實比利作為歷史上唯一一位三奪世界盃冠軍嘅球員，其歷史地位基本上無人可以撼動，就算係馬勒當拿亦都要屈居其下。