Derrick Rose - NBA歷史最年輕MVP，但因為兩次嚴重受傷差啲生涯完結，雖然生涯經歷左由最高處跌至最低處，甚至差啲就決定退役。不過，最終佢仍然能夠再次爬起身，唔單只係正常咁比賽，佢更好似回復巔峰，甚至寫下生涯紀錄。

今季繼續效力木狼嘅Rose，本來可能只係被認為係球隊嘅後備控衛，但係佢表現出黎嘅實力及狀態都係球隊之中最好的，甚至多次接管比賽為球隊帶黎勝利，其中今年10月面對爵士嘅時候，Rose更取下其生涯最高嘅50分，賽後哭成淚人。一位經歷兩次大傷嘅30歲球員竟然可以有咁嘅表現，相信唔係太多人能夠估得到。

對於自己嘅經歷，相信Rose自己亦都估唔到，佢估唔到自己仍然有咁嘅機會去表現自己，所以可能就係咁佢日前喺網上發佈左一條短片，回顧自己嘅職業生涯，無論係MVP、高光表現、受傷等等都一一記載，最後佢感謝呢一切，並確立自己未來會繼續專心一意比賽，「I’m D-Rose, and I’m whole again.」就係其宣告！

今季Rose目前場均上陣29.5分鐘取下18.3分4.5助攻3籃板，投射命中率49%、三分球命中率46.9%，NBA其他球隊準備迎接將會更強嘅Derrick Rose啦！