目前於意甲擁有絕對優勢嘅榜首祖雲達斯，並未安於現況，佢地好有可能會有交易行動，其中可能會賣掉其中一名前鋒，以籌集資金去收購巴黎聖日耳門射手基利安麥巴比。

要收購當日加盟PSG身價達1.8億歐元嘅麥巴比絕對係談何容易，所以祖記必須出售極具價值嘅球員，其中曼聯目標之一嘅阿根廷射手戴巴拿可以話係最好嘅選擇。

對於離開祖記，戴巴拿明確表示完全無呢個諗法，佢直言喺祖記非常開心，其目標喺贏得所有賽事錦標。

雖然戴巴拿無諗住走，但唔代表祖記唔會賣走佢，而祖記方便亦已經為戴巴拿估價為1.5億歐元。當然，要將戴巴拿以1.5億歐元賣走並唔容易，所以外界估計祖記最多可以將佢套現8000萬至1億歐元。

如果將戴巴拿賣走，咁祖記顯然就係想搵另一位超級巨星黎到去同C朗拿度配合，而呢一位可能就係PSG嘅年輕法國射手麥巴比。

對於PSG黎講，佢地梗係想留住麥巴比，但由於歐洲足協嘅公平競技條款，佢地好可能被迫喺尼馬同麥巴比身上作出2選1嘅選擇。

岩岩生日無耐嘅麥巴比，現年都只係20歲，自從加入PSG後一共上陣63場攻入37球。