辛迪卡蘇拿(Santi Cazorla)呢個名，相信唔少球迷都一定知道，但係如果你無緊貼佢嘅消息，可能你仲係記住佢係一名長期受傷、長期喺阿仙奴傷兵名單、傷多過踢，結束球員生涯只係時間問題。不過，呢位「十字軍」已經完全復活，並喺岩岩嘅西甲重擊皇馬！

去年夏天，34歲嘅卡蘇拿離開效力6年嘅阿仙奴以自由球員身份回歸母會維拉利爾，簽約1年。不過，你唔好以為佢番去養老等待掛靴，呢位西班牙中場已經全面康復，雖然接近兩年無踢比賽，但係佢好快搵番狀態，喺20場比賽入面攻入2球並有5次助攻，更有兩場比賽成為Man of the match。

而其中表現最出色嘅一場比賽，就絕對要數岩岩與皇馬嘅賽事，佢以正選身份上陣，喺4分鐘就為球隊率先攻入領先嘅一球，雖然維拉利爾其後被皇馬攻入兩球反超前，但係喺比賽82分鐘，卡蘇拿再攻入一球，個人梅開二度開成功迫和皇馬，為球隊搶下重要嘅1分，要知道而家「黃色潛艇」與畢爾包同分，僅因為得失球排喺西甲尾四位置。

卡蘇拿面對皇馬時嘅數據絕對可以用華麗黎形容：上陣90分鐘、2次射門、2入球、5次威脅傳球、總傳球數64次、傳球成功率93.65%、1次過人、1次解圍、2次被犯規

講真，如果睇番卡蘇拿嘅傷勢，你絕對會覺得佢應該一早已經要掛靴，專心休養，避免情況再惡化，因為當日其主診醫生已經同佢名言，因為傷口受細菌感染，情況相當嚴重，會有截肢嘅可能，如今能夠康復，並且再次走上球場比賽絕對係一個奇蹟。

曾經，卡蘇拿連走路都係奢望，再次走上球場比賽更加係諗都唔敢諗，到如今慢慢康復，再次走路、跑步，甚至踢波、比賽，一路走來卡蘇拿嘅痛苦絕對唔係常人能夠明白的。不過，卡蘇拿憑住堅毅嘅精神一路走來，對足球亦都無放棄，最終終於成就呢段球壇奇蹟，球迷們亦可以再次見證呢位中場大放異彩嘅表現！