意大利南部第二大城市巴里(Bari)，日前正式成為首個踩單車番工資助計劃嘅意大利城市，而計劃亦都有基金資助市民買新單車或翻新單車。

目前巴里人口為32萬人，而會踩單車番工嘅市民將有機會每月獲得25歐元嘅資助，計劃暫試行4個月。

今次踩單車番工計劃係獲得意大利環境局資助54.5萬歐元，其中踩單車番工放工嘅市民，每公里可獲得20仙，而如果你係坐電動單車嘅話則每公里可獲得4仙。

而計劃上限規定，每人每日最多可獲得1歐元嘅資助，而整個計劃4個月落黎則每人最多可獲得100歐元。資助購買單車方面，計劃每人最多可獲資助150歐元，而購買電動單車則可獲得250歐元嘅資助，另外翻新單車則可獲得100歐元嘅資助。

計劃資金預計最多可購買3000部單車，而受惠於計劃嘅人數則可以達到1000人。而為左確保市民唔會作弊，每部單車都會配上GPS裝置。另外，踩單車距離最長嘅10位市民，將可額外獲得50歐元嘅獎勵。

踩單車番工計劃，絕對係一個環保嘅方案，因為可以大量減少汽車排放廢氣。同時，計劃亦都可以減少馬路車輛使用量，減低堵塞問題。如果香港都有個咁嘅計劃，唔知有幾多人願意踩單車番工放工呢？特別係成日塞車嘅吐露港。